மார்க்கெட் தாத்தாவின் பெட்டிக்கடை.

மார்க்கெட் பெட்டிக்கடை

பணத்தின் மீது எப்போதும் ஆசை உண்டு . பேருந்து , மகிழுந்து , ரயில் , மொபெட் , சைக்கிள் , விமானம்  வரை பயணித்துவிட்ட போதிலும், பள்ளிக்காலங்களில் மதுரை ஜெய்ஹிந்த்புரத்திரிலிருந்து  , டிவிஎஸ் நகருக்கு தினம் 2கிலோமீட்டர் நடைப்பயணத்தின் நினைவுகள் திடீரென மனதுக்குள் திரைவிரித்து ஆடுகின்றன. மதியம் 12.45மணிக்கு தொடங்கும் மதிய ஷிப்ட்டில் படித்த படியால் சுமார் 11மணிக்கு நானும் என்ன அம்மாவும் நடைப்பயணத்தை தொடங்குவோம். பராசக்தி குறுக்குத்தெருவிலிருந்து வெளியே வந்து , ராமைய்யா தெருவின் வழியே வந்தால் , மருதுபாண்டியர் சிலைகள் நிற்கும்  ஜெயஹிந்த்புரம் முக்கிய சாலையை அடைவோம். 90களில் அது  ஒரு வழிச்சாலை தான் , இன்று விரிவுபடுத்தப்பட்டு பிரதான சாலையாக காட்சியளிக்கலாம் . 19 B, ஒரே ஒரு பேருந்து மட்டுமே அந்த சாலையில் வரும். வில்லாபுரம் குடியிருப்பு முதல் அண்ணா நகர் வரை செல்லும் அந்த பேருந்தின் அட்டவணை அதன் ஓட்டுனரை தவிர யாரும் அறிந்ததில்லை. 

அந்த மருது பாண்டியர் சிலைகளின் இடப்புறம் திரும்பி ஜீவா நகர் , ஜெய்ஹிந்த்புரம் மார்க்கெட் , வாய்க்கால் , பொன்மாரி நகர் வழியே  டிவிஎஸ் நகர் வருவது தான் எங்களின் பாதை. மருது சகோதரர்களின் இடப்புறம் முத்துமாரியம்மன் கோவில் , வலப்புறம் வீரகாளியம்மன் கோவில் இருக்கும் . இந்த பகுதி முழுவதும் நிறைய குட்டிக்குட்டி கோவில்கள் அமைந்திருக்கும். ஒருமுறை என்னுடைய கால்கள் மரத்துபோய் நடக்க முடியாமல் இருக்கையில் வீரகாளியம்மன் கோவிலின் விபூதி குங்குமமும்  ,முத்துமாரியின் வேப்பிலை நீரும் தான் என்னை குணமாக்கியதாக செய்தி . முத்துமாரியம்மன் கோவிலின்  பூசாரி வயதானவர் , அமைதியானவர் . ஆனால் அந்த கோவிலில் நான் பெரும்பாலும் நின்றதில்லை. அவர் கொடுக்கும் வேப்பிலை நீரின் கசப்பு , என்னை சாலையின்  மறுபுறமாகவே நடக்கவைத்திருந்தது. பலநேரங்களில் அந்த கோவிலை கடக்க வேண்டாமே என ராமையா தெரிவிலிருந்து புலிப்பாண்டியன்(ராம்கி உங்கள் தெரு ) தெருவழியாக மெயின் ரோட்டுக்கு வந்துவிடுவேன்.

நேராக முக்கிய சாலை வழியாக வந்தால் , வீட்டுக்கும் பள்ளிக்கும் நடுமத்தியமாக ஜீவா நகர் பேருந்து நிறுத்தம் . எனக்கு மிகவும் பிடித்த நான்குமுனை சந்திப்பு இது . ஒரு புறம் செர்ரிப்பழம் உதிர்த்த தில்பாசந்த்  கிடைக்கும்  அமுதம் அடுமனை, மறுபுறம் நாவூறும் அருண் ஐஸ்கிரீம் ஹரன் ஐஸ் கடை , இன்னொரு முனையில் கரும்புச்சாறு , பழக்கடைகள் என நாவுக்கு தீனியோ இல்லையோ மனதுக்கு மிகசுவையாக இருக்கும். இவையெல்லாமே பத்து ரூபாய்க்கு மேலான சமாச்சாரங்கள். கண்ணுக்கும் மனதுக்கும் இனிப்பானவை. இங்கிருந்து  9B , 9C என வேறு வழியாக டிவிஎஸ் பள்ளியை கடந்து செல்லும் பேருந்துகள் கிடைக்கும்.

இதனை கடந்து ஐநூறு அடி தூரத்தில்  ஜெய்ஹிந்த்புரம் மார்க்கெட்.  வலப்புறம் காய்கறி சந்தையும் , இடப்புறம்  மீன் சந்தையும் முதலில் இருந்தது . பின்னர் அங்கே ஒரு சுகாதார பூங்கா அமைத்ததால் காய் சந்தையும் கறிச்சந்தையும் ஒன்றாக குடியேறிவிட்டன. சந்தையின் அருகாமையில் அவனியாபுரத்து ஏரி நீர் வாய்க்காலாய் ஓடிக்கொண்டிருக்கும். சந்தையின் அருகே நீர்த்தேக்கம் என்றால் அந்த நீரின் நிலையை நாம் அறிந்துகொள்ளலாம்.
அந்த கலங்கிய நீரோடையின் முட்டுச்சந்தில் தான் மிகப்பெரிய ஆலமரம் நிழல் கொடுத்துக்கொண்டிருக்கும்  .

சாலை வளைந்து டிவிஎஸ் நகர் பக்கமும் , நேராக பழங்காநத்தம் பக்கமும் பிரியும் அந்த சந்திப்பில் ஒரு புறம் மார்க்கெட் , மறுபுறம் நீரோடை , ஆலமர நிழல் சூழ அமைந்திருந்தது அந்த தாத்தாவின் பெட்டிக்கடை.

ஐந்து பைசா புளிப்பு மிட்டாய் , ஐந்து பைசாவுக்கு ஒரு பாக்குமிட்டாய் ,  ஐந்து பைசாவுக்கு ஒரு சூடமிட்டாய் ,   காலணாவுக்கு ஒரு தேன்மிட்டாய் , காலணாவுக்கு ஒரு கடலைமிட்டாய் , காலணாவுக்கு ஒரு கொக்கோமிட்டாய்,    காலணாவுக்கு ஒரு கம்மர்கட்டு இதெல்லாம் சாதாரண தீனிகள்.  ஐந்து  பைசாவுக்கு ஒரு கலர் பப்படம் தான்  அதிகமாக விற்றுத்தீரும். கம்மியான விலையில் இருக்கும் பொருட்களை விட விலையுயர்ந்த அந்த லாலிபாப் தான் எனக்கு பிடித்த பண்டம்.

அது சாதாரண லாலிபாப்பில்லை . எத்தனை நிறங்கள் மொத்தமுள்ளனவோ அத்தனை நிறத்திலும் அங்கு லாலிபாப் கிடைக்கும்.  அந்த லாலிப்பாப்புகளை பிரித்து உடனே தின்று விடமுடியாது. அந்த மிட்டாய் பாகத்தை சுற்றி நகலான ருபாய் நோட்டுகள் ஒட்டப்பட்டிருக்கும். அப்படி ரூபாய்நோட்டுகளை மெல்ல கிழியாமல் முதலில் பிரிக்கவேண்டும். பிரித்த பின்னர் அதன் காகித ரூபாயின் பின்னால் இருக்கும் ஆயிரத்தில் ஒரு பங்கு சுவையை நாவின் சுவைஅரும்புகளுக்கு முதல் படையல் வைக்கவேண்டும்.

அதன் பின்னர் அந்த எச்சில் பட்ட காகித ருபாயை அரை ட்ராயரின்  உள்பக்கத்துணியில் துடைக்கவேண்டும். பின்னர் அது  பத்திரப்படுத்தப்பட்டு நட்ராஜ் ஜாமெட்ரி பெட்டிக்குள் செல்ல வேண்டும் . நக்கிய நாவின் ஈரம் விரல்களில் காயும் முன் இத்தனையும் முடிக்கப்பட்டு , லாலிபாப் நம் உள்நாக்கில் மணிஅடித்திருக்கும் . பல்துலக்க கற்றுக்கொடுக்கப்பட்ட அத்தனை வழிமுறையும் கடைபிடிக்கப் படவேண்டும். தொடர்ந்து நக்காமல் நடுவில் சிறிது நேரம் லாலிபாப் வாய்க்குள்ளே மாயணப்படுத்தப்படவேணும் . அப்போது சுரக்கும் தித்திப்பான எச்சில் மேல்நாக்கால் சுழற்றப்பட்டு , கீழ்வழிய ஓடி முழு வாயும் தித்திப்பாக்கப்பட்டவுடன்  முழுங்கப்படவேண்டும்.

இத்தனை சுகங்களையும் ஒரு சிறுவன் நடந்துகொண்டே பள்ளிநோக்கி செல்கையில் அனுபவிக்க நேரமில்லாமல்  ஏற்பட்ட கொடுமை யாருக்கும் நேர்ந்துவிடக்கூடாது. லாலிபாப்புகளின் ருபாய்கள்  என் கண்டக்டர் விளையாட்டுக்கு உபயோகமானதாக இருந்தன. சில்லறை கொடுத்து லாலிபாப் வாங்கி அதில் ருபாய் சம்பாதித்த சுகமே அலாதி.

ஆயிரம் , ஐநூறு ரூபாய்கள் அப்போது இருந்ததே தெரியாத காலம். வெறும் பத்து ரூபாய்க்கு எத்தனையோ மதிப்பிருந்தது. லாலிபாப்புகள் எனக்கு பலநூறு ரூபாய்கள் பரிசாக கொடுத்தன. மூன்று ஆண்டுகளில் பள்ளியின் அருகில் இடம்பெயர்ந்தபிறகும் சனி ஞாயிறுகளில் அங்கு செல்வதை வழக்கமாக வைத்திருந்தேன். திடீரென ஒரு நாள் தாத்தாவின் கடை மூடப்பட்டுவிட்டது . அவருக்கு அன்றே தெரிந்திருக்கிறது மதிப்பில்லா நோட்டுகளை நாம் விற்றுவிட்டு  கிளம்பிவிடலாம் , மதியிலா இவர்கள் அதனோடு பாடுபடட்டும் என்று.   

இரும்புப்பாலம்

லண்டனிலிருந்து ஐம்பது மைலில் இருக்கும்  பேசிங்ஸ்டோக் ரெயில்நிலையத்தின்  மிக அருகில்  இந்த பாலம் இருக்கின்றது. ரயில் நிலையத்தின் தெற்கு வாயிலுக்கு இடப்புறம் முப்பது படிகள் கீழே இறங்கினால் சாலை ஐந்தாக பிரியும் ரவுண்டானா இருக்கும். மேற்கு நோக்கி செல்லும் சாலையின் அருகே  போக்குவரத்து சிக்னலின் கூப்பிடு தூரத்தில் இந்த பழைய இரும்பு ரயில் பாலம் திடகாத்திரமாக நிற்கிறது. ஏறி,இறங்கி ,வளைந்து, நெளிந்து நம்மை அலையவிடும் சாலைகளை வேடிக்கை பார்த்தபடி கம்பீரமாக நிற்கும். இங்கு அலுவல் வேலையாக வந்தபின்னர் இந்தப்பாலத்தை நிதமும் கடக்கிறேன். ஒவ்வொரு நாளும் ஒரு  கதை சொல்கிறது .

அந்த மஞ்சள் மாலை நீண்டுகொன்டே சென்றது . இந்த வருடத்தின் அதிக வெட்பமான நாளாக அன்று அறிவிக்கப்பட்டிருந்தது. பளிச்சென கண் கூசும் சூரியனிடமிருந்து தப்பிக்க பல பறவைகள் அந்த பாலத்தின் அடியிலிருக்கும் இரும்பு அடித்தள கம்பங்களில்  ஒளிந்து கொண்டன. அது ஏற்கனவே கூட்டுக்குடும்பமாக வாழும் கருங்கழுத்தனின் குடும்ப இடமாகும். மனிதர்கள் வரும் முன்போ, ஏன் அந்த பாலமே வரும் முன்பு கூட அதன் மூதாதையர்கள் அங்கு குடிவந்திருக்கலாம். அவன்  மட்டும் அந்த கூட்டத்தில் தனியாக தெரிவான். அங்கிருக்கும்  குடும்பத்தார் அனைவரின் கழுத்தும் இளம்பச்சையாக இருக்கும் , ஆனால் இவனுக்கு மட்டும் சற்றே கருமையாக மின்னும். அதனால் இவனை கருங்கழுத்தன் என அழைக்கின்றேன். மற்றவர்கள் போலத்தான் இவர்களும் காதல்ரசம் பொழியும் போது அதன் அனுபவத்தை கணீர் குரல் கொண்டு கத்திக்கொண்டாடும் , மற்ற நேரங்களில் கீச்சிட்டும் , ரெக்கைகளை அடித்தும் சத்தம் செய்து கொண்டு விளையாடிக்கொண்டிருக்கும். 

அந்த மாலையின் சகுனங்கள் சரியாக இல்லை . அவனை பார்க்க நான் அலுவலகம் விட்டு விரைவாக கிளம்பி வந்து கொண்டிருந்தேன் .

இரண்டு மணிநேரம் முன்னர் ,

பெரியகுடும்பம் என்பதால் அந்த சுற்றுவட்டாரமே சற்று நசநசவென சத்தமாக இருக்கும். அந்த மாலை வேலை எதிர்பாராமல் வந்த விருந்தாளிகளால் கருங்கழுத்தனின் வீட்டார் திக்குமுக்காடி போனர். வெயில் தாங்காமல் பலர் அந்த இதமான, குளிரான பழைய பாலத்தின் அடியில் இருக்கும் இவன் குடும்பத்தாரின் வீட்டுக்கு வந்துவிட்டிருந்தனர்.  வீட்டின் சுற்று பெரியதாக இருப்பினும் தங்குமிடம் சிறிது தான். இரும்பு பாலத்தின் அக்கம்பிகளில் அமரும் அகலம் ஒரு ஜான் மட்டுமே . ஒருவர் அமரலாம் , இருவர் நிற்கலாம் . ஆனால் நீளம் சுமார் எண்பது அடி இருக்கும் , இதைப் போல் மூன்று பெரிய ராச்சத தூண்கள் இருந்தால் அவர்கள் குடும்பத்துக்குள் சமாளித்துக்கொண்டனர். 

குட்டிகளையும் , முட்டைகளையும் பத்திரப்படுத்த ஒரு தூண் தனியாக ஒதுக்கிவைத்திருந்தான் கருங்கழுத்தன். ஆனால் இன்று வந்த கூட்டத்தை உள்ளே அழைக்க வேண்டி வந்ததால் , பாதியை அவர்களுக்கு குடுத்துவிட்டு , அவனே அங்கு சென்று நின்றுகொண்டான். பொறுக்கிய சுள்ளிகளில் முட்டைகள் ஓரமாக இருந்தன. அளவுக்கதிமாக அங்கு கூடிய கூட்டத்தால் ஒரு வித கலவர நிலையை அவன் உணர்ந்திருந்தான். தன் வீட்டு இளையர்கள் அவன் மனமறிந்து அமைதியாக இருந்தனர் . 

அவர்களுக்கும் சற்றே பதற்றமாக இருந்தது. 

புதிதாய் வந்திருந்த இளையர்களுக்கு அந்த இதமான குளிரும் , நிழலும் , இருட்டும் ஒரு வித பரவச நிலையை அளித்திருக்க அவை வேகமாக ரக்கையடித்து  அந்த பாலத்தின் அடியில் ஓட ஆரம்பித்தன.

கீழே சாலை பரபரப்பாக  இயங்கிக்கொண்டிருந்தது.  

முன்பே கூறியது போல் பழைய பாலம் என்பதால் மேலே குடியிருக்கும் புறாக்களை போல் , கீழே பெருச்சாளிகள் அதிகமாக இருந்தன. மேலே நடக்கும் சலசலப்பினை பார்த்து கோவமான எலிகளில் ஒன்று விருட்டென சாலையை கடக்க முற்பட்டு ஓட, சிறு வயது பெண் ஓட்டிவந்த மகிழுந்தை சடக்கென்று நிறுத்தினாள். வலப்புற முன்சக்கரம் பாதி எலியை பதம் பார்த்திருந்து. ஒரு எலிக்கா இத்தனை என நினைக்கவேண்டாம், அதன் பருத்த சரீரம் சிறிய பூனையின் அளவிருக்கும். 

தரையிலும் ஒரு வித பதற்றம் தொற்றிக்கொண்டது. 

ஏற்கனவே எலிகளால் குஞ்சுகளை இழந்த மேல்வீட்டாரில் இருந்த கோபக்கார குடும்பக்காரன் ஒருவன் அந்த எலியை கொத்த , அதன் நிலையை காண விருட்டென சிறகடித்து கீழே பறந்தான் . இளையர்கள் பின்தொடர்ந்தனர் . சாலையில் தரையிலிருந்து இரண்டாள் உயரத்துக்கு புறாக்கள் கூட்டம் வட்டமடிக்க , மக்கள் சற்று தயங்கி க்ரெஈஈஈன் க்ரீஈஈன் என ஹார்ன் அடிக்க ஒரு வித குழப்பம் முற்றுமாக அங்கே அரங்கேறியது.

மூன்றாவது தூணின் அந்த ஓரத்தில் இருந்த கருங்கழுத்தனின் பார்வை ஒட்டுமொத்த நிகழ்வையும் கிரஹித்துக்கொண்டு , இந்நிலை விரைவாக கழியவேண்டிக் கொண்டிருந்தது. ஒருபுறம் குஞ்சுகளையும் , முட்டைகளையும் காக்க வேண்டியகட்டாயமும் , மறுபுறம் நெறிதவறி ஆர்பரித்துக்கொண்டிருந்த கூட்டத்தினை அடக்கவும் முடிவெடுக்க முடியாமல் தவிக்க , வெள்ளைமடி தான் குஞ்சுகளை பார்த்துக்கொள்கிறேன் என சொன்னதால் பறந்துசென்று இளையர்களை அடக்க முற்பட்டது. 

அவன் வீட்டார் , இவன் பறக்க எத்தனிப்பதை  கண்டு பெருத்த ஒலிகளை எழுப்ப ஆரம்பித்தனர் . அனைவரின் குரலும் ஓர் சீராக அந்த பாலத்தில் எதிரொலித்தது. புதிய விருந்தாளிகள் திரும்பிப்பார்க்கவும் , தூணை நெம்பிக்கொண்டு சிறகுகளை அகல விரித்துக்கொண்டு , குரல் எழுப்பியவாரு கம்பீரமாக பறக்க ஆரம்பிக்கவும் அனைவரும் ஒரு வித அமைதிக்கு வந்தனர். 

ஒவ்வொருவரும்  தூண்களை நோக்கி திரும்ப ஆரம்பித்தனர் . சற்றே பயந்து போன மூன்று இளைஞர்கள் திசையறியாமல் மூன்றாம் தூணை நோக்கி விரைய , அதனை இடக்கண்ணின் ஓரத்தில் கவனித்தவன் போல் இவனும் அங்கே சீறினான். அந்த நொடி முட்டைகளை முழுவதுமாக மறைக்க வெள்ளைமடி அதனை அணைப்பது போல் சிறகு விரிக்க , கவனியாமல் மூன்று இளைஞர்களும் அதன் மேல விழ , தடுமாறிய வெள்ளைமடி முட்டைகளை தவறவிட்டது. பதறிப்போன ,கோபமான கருங்கழுத்தன் அதனை தாவிப் பிடிக்க முற்பட சாலையில் வேகமாக வந்த அரசுப் பேருந்து இடிக்கவும்  துடிதுடித்து கீழே விழுந்தான்.

இப்போது ,

சாலை அமைதியாக இருந்தது . அந்த தூண்கள் காலியாக இருந்தன . ஓரத்தில் குப்பையோடு குப்பையாக , தன் குடும்பத்தினரின்  கொட்டிக்கிடந்த மலங்களும் , சாலையில் உடைந்த முட்டைகளும் . கருங்கழுத்தனும் , பெருச்சாளியும் குவிந்துக்கிடந்தன. அந்த மாலை முடிவை நோக்கிப் பயணிக்க , இருள் புக ஆரம்பித்தது. ஒரே மாலையில் வாங்கிய காவுக்கு பரிசாக பழைய இரும்புப்பாலம் அமைதியான மயாணமாக காட்சியளித்தது.    

#ஒருவாழ்க்கைஉனக்காக வாழ்ந்திடு

சரவணன் சந்திரன் எழுதிய 'பாவத்தின் சம்பளம்' படித்துக்கொண்டிருக்கிறேன் . 8ஆம் அத்தியாயம்மிக முக்கியமான செய்தியை பிரதிபலிக்கிறது . காதலித்து மணந்த கணவன் மனைவி  விவாகரத்து செய்துகொண்டதற்கு  முக்கியமான ஒரு காரணம், மனைவியின் அலுவலகத்தில் அவளுடைய கணவன்  இசை ஆர்கெஸ்டராவில் பணிபுரிவதை கேலிபேசியது என விளக்கியிருந்தார் . அதன் கடைசி பத்தியில் கூறிய வார்த்தைகள் மிகக்கூர்மையானவை.

//அவ்வளவு நாள் அழகாகக்  காட்டிய முகம் பார்க்கிற கண்ணாடி உடைவதற்கு பெரிய பாறாங்கற்களெல்லாம் தேவையே இல்லை.மணல் துகளையொத்தது என ஏளனம் கொள்ளும்படியான சிறுகல் கூட போதும்.உடைசல் என்பது வந்து மோதும் எதிர்பாராத கூர்மையான வேகைத்தை பொறுத்தது //"

இது நிதர்சனமான உண்மை . நம்மில் பல பேர் பேச்சு வழக்கில் பிறரிடம் , எவ்வளோ 70மதிப்பெண் தானா உன் குழந்தை (கல்வியை எடை போடாதே முட்டாளே),
என்ன 31வயசாகப்போகுது உன் பையன் இன்னும் படிக்கிறானா ?(கல்லாதது உலகளவு)
'எப்படி 70000 சம்பளம் போதும் இருக்கிற விலைவாசில?'(100லும் , 1000த்தில் வாழ்பவன் இருக்கிறான்),
'என்ன இன்னும் சொந்தமா வீடு வாங்களையா ?'(தங்க இடம் இருந்தால் போதும்) ,
' கல்யாணம் ஆகி மூணு வருசமா பிள்ளை பிறக்கலையா ?'(வேணும் போது பெத்துப்பாங்க) , 'என்னதான் இருந்தாலும் படிச்ச பொண்ணுனு உன் மருமகளுக்கு திமிறுஇருக்கும்'(படிச்சதால தான் முகத்துக்குநேரே பதில் சொல்லுறா,இல்லாட்டி உன்ன மாதிரி புறம்பேசுவா),
 'மாப்பிள்ளை வெளியூர் சுத்தினாலும் இன்னும் உன்ன உள்ளூரே சுத்திக்காட்டால'(ஓடுற வயசு உழைக்கிறான்) ,
 'கடன் வாங்கியாது கார்ல போகணும் சார் அது தான் பெருமை'((அமரர் ஊர்தி போலாமா ?). இப்படியாக அலுவலகத்தில் தேநீர் நேரத்தில் , சிகையழகு நிலையத்தில் முகச்சாயம் பூசுகையில் , சிறைவைக்கப்பட்ட அடுக்குமாடி குடியிருப்பின் ஒற்றையடி புல்வெளி பாதைகளில் மாலை நடைப்பயணத்தில் புரளி பேசிச்செல்லாதீர்கள். காலம் 70களில் இல்லை. தனிமனித எதிர்பார்ப்புகள் அதிகரித்து விட்டன . ஒப்பீடு இன்றைய இளையர்களின் ஆழ் மனதில் தாக்கங்கள் ஏற்படுத்துகின்றன. நம்மில் ஒவ்வொருவரும் பேசநினைக்கும் ஒற்றைச்சொல்லையும் கூட மனதுக்குள் ஒத்திகை பார்த்து , நம்மையே அதில் ஒப்பிட்டுப் பார்த்து கூறவேண்டும். சமகால நண்பர்கள் இதைப் போன்ற வெட்டி பேச்சுச்களில் இருந்து தப்பித்து மனஅமைதி அடைந்திடுங்கள்.   
#ஒருவாழ்க்கைஉனக்காக வாழ்ந்திடு


    

ஜாடிகள் மாற ஆரம்பித்தன

ஜாடிகளின் ஆதிக்கம் நிறைந்த காலம் அது .
ஊரெங்கும் ஜாடிகள் ஆட்டம் தான் .
நினைக்கும் போது வேண்டிய மூடியை எடுத்துக்கொண்டன

சில ஜாடிகளுக்கு பல மூடிகள் தேவைப்பட்டன 
சில ஜாடிகள் நினைத்தார் போல் மூடி மாற்றிக்கொண்டன
வீட்டுக்குள் எப்போதும் சில மூடிகள் அடைப்பட்டு கிடந்தன
வெளியில் யாருக்கும் தெரியாமல் சில முடிகளோடு ஜாடிகள் திரிந்தன.

ஒற்றை ஜாடி பல மூடிகளை மாற்றிமாற்றி பிரயோகித்தன
எள்ளுத் தாத்தாக்களின் காலம் அது.
ஒரு வீட்டில் ஒரே ஜாடிக்கு ரெண்டு மூடிகள் இருந்தன.
இரண்டாம் மூடியின் மோகம் பெரும்பாலும் ஜாடிகளை ஆட்டுவித்த காலம்.

பெரிய ஜாடிகளை சுற்றி எப்போதும் வதவதவென சிறிய ஜாடிகள்.
முலைக் கொண்ட சிறிய ஜாடிகள் உடைக்கப்பட்டன
சீக்கின் பிடியில் சில சிறிய ஜாடிகள் ஒன்றுமில்லால் போன காலம்
பசியின் பிடியில் சிறியஜாடிகள் ஒன்றுமில்லால் போன காலம்
ஆனாலும் பெரிய ஜாடிகள் ஆதிக்கம் குறையவில்லை.
வருந்திய மூடிகள் வாயடைத்து கண்ணீர் வடித்தன.
ஜாடிகளுக்கு மூடித்தேவை இருந்து கொண்டே இருந்தன.
மூடிகள் மௌனித்து அமைதி காத்தன.

காலப்போக்கில் ஒருநாள் ஜாடிகள் கண்விழிக்கையில்
மூடிகள் கல்விகற்ற நெகிழிப்புட்டிகளாகவும் கொள்கலன்களாகவும் மாறின
ஜாடிகளின் காலம் முடிந்துவிட்டது போலும்.
நெகிழிப்புட்டிகள் எல்லா திசையிலும் பிரபலமாகின
ஜாடிகளின் தேவை குறைய ஆரம்பித்தது .
ஜாடிகளை மூடுவதுமட்டும் மூடிகள் வேலையில்லை என போராட்டக்குரல் ஒலித்தது.
மூடிகள் தம்மை புதுஉலகுக்கு தயார் செய்துகொண்டன.
ஜாடிகளை மூட புட்டிகள் தயாராகயில்லை.
அப்படி மூடினாலும் ஜாடியும் புட்டியும், ஜாடியும் மூடியும் போலில்லை.
நெகிழிகளின் காலமிது.
வேண்டிய வண்ணத்தில் வேண்டிய விதத்தில் கொள்கலன்கள்
தங்களை சிங்காரித்துக்கொண்டன.
ஜாடிகள் தங்களை நோக்கி இவை வருமென நினைத்து ஏமாந்துகொண்டிருந்தன.
ஜாடிகள் மாற ஆரம்பித்தன.
ஜாடிகள் மாறவில்லையெனில் சீண்டுவாரற்று சிதிலமடைவதே நிலை
ஜாடிகள் நெகிழிகளை சமமாக உணரவேண்டிய நேரமிது.
உணரும்.

சரியானதிட்டமிடல்வேண்டும்

தொடர்ந்து நான்கு/ஐந்து மாதகாலமாக பங்கேற்க வேண்டிய முக்கிய நிகழ்வுகளில் பங்கேற்க முடியவில்லை. ஏதோ தடை எனை அறியாமல் வந்துகொன்டே இருக்கிறது . அலுவலக வேலைச்சுமை அதிகரித்து விட்டது. சுமையாய் அதனை உணர மனம் தவிர்க்க அதன் மேல் ஓர் அதீத ஈர்ப்பு வந்துவிட்டது. அதை திருப்தி என சொல்லி குறைத்து மதிப்பிட முடியவில்லை. வீட்டிலும் என் உதவிகள் குறைந்துவிட்டதை உணர்கிறேன். நடுநடுவே அயல்நாட்டுப் பயணம் வேறு. உடல் சோர்வும் மனச்சோர்வும் சிலவாரம் நம்மை அடித்துவிடுகின்றது மாறவேண்டும். 2020க்குள் எட்டு படிகள் கடக்கவேண்டும் என முடிவெடுத்தேன். அரைக்கிணறு தாண்டியாயிற்று. 12புத்தகங்கள் இந்த ஆண்டு படித்து முடிக்க வேண்டும். எல்லாம் காத்துக்கிடக்கின்றன. சிலருக்கு எழுத ஒத்துக்கொண்டேன் . ஒன்று எழுத ஆரம்பித்து முக்காலோடு மூலையில் உள்ளது. இன்னொன்றாவது முடித்துவிடவேண்டி அமர்ந்திருக்கிறேன்.குருவிகள் சுள்ளியை பொறுக்கியாயிற்று. கூடு கட்டவேண்டியது தான் . முக்கிய நிகழ்வுகள் தொடர்ந்து இருக்கின்றன, கண்டிப்பாக தவிர்க்காமல் சென்றுவிடவேண்டும். சுமார் 5 திருமணங்கள் செல்ல முடியவில்லை . இரன்டு வித வாதங்கள் எனக்குள்ளேயே இந்நிகழ்வுகளுக்கு செல்லாமல் இருக்க .
1. நண்பர்கள் நம்மை புரிந்துகொள்வார்கள்
2. வேலை ஒருவித போதையை தருகிறது

#நண்பர்கள்நம்மைபுரிந்துகொள்வார்கள்
#சரியானதிட்டமிடல்வேண்டும்

அந்தநாள்ஞாபகம்

6 ஆண்டுகள் முன்பு பல்லவன் ரயிலில் திருச்சியிலிருந்து கிளம்பி சென்னை மாநகரம் வந்து , பதின்மூன்றாயிரம் சம்பளத்தில் ஆரம்பித்தது தகவல்தொழில்நுட்ப வேலைவாய்ப்பு எங்களுக்கு குழந்தைகள் தினத்தன்று. சுமார் மூன்று ஆண்டுகள் நாங்கள் ஒன்றாக இருந்திருப்போம் . ஒற்றை 18*15 விடுதி அறையில் ஆரம்பித்து , நேரக்கணக்கிட்டு காலைக்கடன் , குளியல் முடித்து உணவு டப்பி அடைத்து சென்று , பின்னர் மூன்று அறைகள் இருக்கும் வீடு வாடகைக்கு மாறி ஒரு ஒருவருடம் கடந்து , 4அறைகள் கொண்ட பெரிய வீட்டில் மாறி , இப்போது வெவ்வேறு திசையில் பயணித்துக் கொண்டிருக்கிறோம்.

தனி வீடு எடுத்த காலங்களில் நாள் அட்டவணை போட்டு மதிய உணவு சமைப்பதும் , பாத்திரம் கழுவுவதும் , காய் கறிவாங்குவதும் , கழிவறை/குளியலறை கழுவுவதும் என செய்து வந்தோம். கருத்து வேற்றுமைகள் இருந்தாலும் எங்களுக்குள் விட்டுக்கொடுத்து ஒன்றாகவே இருந்திருக்கிறோம். அரசியல் பேசும் போது ஒருவரை ஒருவர் எதிர்ப்பதும் , ஆதித்தியா சேனல் பார்க்கும் போது மீண்டும் சேர்வதும் , ஐபிஎல் வந்தவுடன் மீண்டும் முட்டிக்கொள்வதும் , அஜித் விஜயென இரவுபகலாக வாதிடுவதும் என காலம் கலகலப்பாக ஓடிய தருணங்கள் அவை.

எப்போதுமே மாத பட்ஜெட் மனதுக்குள் போட்டுவிடுவோம். சிலர் டைரிக்களில் , சிலர் பழைய நோட்டில் , சிலர் தொலைபேசியில் , சிலர் போடாமலும் அளவாக செலவுகள் செய்து வந்தோம். மேடவாக்கம் குடிசைக்கடைகளில் எங்களின் பல நாள் காலை உணவு சில்லறைகளில் முடிந்திருக்கிறது. 'இன்று நம்மக்கடையில் நீங்கள் தோசைக்கு பதில் இட்லி தான் சாப்பிடவேண்டும்' என கடைக்காரர் உறவினரை போல் உரிமையாக எங்களுக்கான மெனுவை கூறியிருக்கிறார் .

ஒன்றாக சேர்ந்து வெளியூர் செல்ல வேண்டுமானால் , ஒரு முதல் தொகையை என்னிடம் அனைவரும் தந்து விடுவார்கள் . பின்னர் நாள் முழுவதுமாக செலவுசெய்து மீண்டும் வீடு வந்தவுடன் கணக்கு , ரசீதெல்லாம் வைத்து எங்கள் கணக்குப்பிள்ளை ராகவன் சரிபார்க்க மீதி
செலவுபாக்கியை சரிசெய்து கொள்வோம். விடியற்காலை 3மணிக்கு குளித்து கிளம்பி சோளிங்கர் சென்றோம், திருமண வரம் வேண்டி திருவிடவெந்தை , உல்லாசமாக மஹாபலிபுரம் , திருவல்லிக்கேணி , மெரினா கடற்கரை என பட்ஜெட் சுற்றுலாக்களில் பயணப்பட்டோம்.

மாத முடிவில் பால்கணக்கு , மளிகை கணக்கு , கரண்டு பில் , வாடகை கணக்கு என எல்லாம் சரிபார்த்துக்கொள்வோம். பிரசன்னாவும் சரவணனும் கணக்குக்குள் வந்து கேள்வி கேட்டதில்லை. ராகவனின் கறாரான தணிக்கை அறிக்கைக்கு நாங்கள் கட்டுப்பட்டோம்.
மாதம் இருமுறை சிலர் சொந்தஊர்க்கு செல்வதும் , முருகன் தியேட்டரில் ஐம்பது ரூபாய்க்கு படம் பார்ப்பதும் , மொட்டைமாடியில் வெட்டி அரைட்டை அடிப்பதும், T51/C51 பேருந்தில் நாள் பாஸ் வாங்கி சும்மாக்காச்சும் ஏறிஇறங்கி பயணித்ததுமென எளிமையாக கடந்துவிட்டிருந்தோம்.

சற்றே ஆரவாரமாக சரவணன் , கவலையற்ற பிரசன்ன , மனதுக்குள் கணக்குபோட்டுக்கொண்டு நான் , நிதானித்து திட்டமிட்ட ராகவன் என ஒரு விசு திரைப்படமாக நாங்கள் இருந்தநாட்கள் மனத்திரையில் இப்போது ஓடிக்கொண்டிருக்கிறது. ஐந்தாவதாக உடன் இருந்த கார்த்தியால் எங்களுக்கு தொல்லையில் , எங்களால் அவனுக்கு தொல்லையிலை. பின்நாளில் அஸ்வின் உடன் இணைய சமையல் பளு குறைந்தது. அவன் கைப்பக்குவம் சற்றே நன்றாக இருக்கும் .

#அந்தநாள்ஞாபகம்

அ ..ஆ..ஆம்ஸ்டெர்டாம் - 2

மாலை நான்கு மணி . பளிச்சென வெயில் போலியாய் 14 டிக்ரீயில் அடிப்பது போல் எங்களை ஏமாற்ற நினைக்கிறது . பறக்கும் ரயிலில் இறங்கி தரைவழி ரயிலில் ஏறப்போகையில் புகைமண்டலம் . பொது இடங்களில் புகைப்பதற்கு இங்கு தடை இல்லை . சில முட்டுச்சந்துகளில் கஞ்சாக்கள் இழுத்துக்கொண்டிருக்கிறார்கள் . ஆண் பெண் திருநங்கைகள் என பாகுபாடின்றி புகைக்கின்றனர் . பொதுவாக பார்த்தால் ஐரோப்பியர்கள் இங்கே இருவகையில் இருக்கிறார்கள் . ஆண்களில் இரண்டு , பெண்களில் இரண்டு . ஆறடி உயரம் , ஒல்லியான உடம்பு, நீண்டமுகங்கள் சோடாபுட்டிகள் ஒருவகை ஆண்கூட்டம். பெருத்த சரீரம் , கட்டையான உடம்பு வாகு , ஊதிய முகங்கள் ,  தொங்கும் தொப்பைகள் இரண்டாம் வகை ஆண்கள். ஆறடிக்கு சற்றே கம்மியான உயரம் , மெல்லிய இடை அல்லது பெருத்த பிருஷ்டங்கள்  , கனத்த தொடைகள் கனமான உடம்பென இருவகை பெண்கள் . உயரம் இல்லா மக்கள் கூட்டமென்றால் கிழக்காசிய மக்கள் என்று முகத்தை பார்த்தவுடன் தெரிந்து விடுகின்றன .

பழையதும் புதியதும் என மாறி மாறி ரயில்கள் வந்தவண்ணம் இருந்தன . நகரத்தின் மையப்பகுதியில் மாளிகை . ஓர் மதத்தினரின் பல உட்பிரிவு தேவாலயங்கள் திசையெங்கும் தெரிகின்றன. மதங்களுக்கு அப்பால்  அக்கோபுரங்களின் மணிக்கூண்டுகள் அனைவருக்கும் நேரத்தை  காட்டிக்கொண்டிருந்தன. நகரெங்கும் ஓடிக்கொண்டிருக்கும் ரயிலின் அருகேயே  கால்வாய் ஓடி ஓடி  வேடிக்கை பார்த்துக்கொண்டிருக்கிறது. வெளிநாடு என்பதால் மண்டிய புதர்களை மறைக்க வண்ணவண்ண பூக்கள் மலர்ந்திருக்கின்றன. மேல்கூறிய முதல் வகை ஆண் ஒருவர் எதிர் இருக்கையில் அமர்திருந்தார். எழுந்து இறங்கச் செல்கையில் இரு கரம் கூப்பி நமஸ்கார் என கூறிவிட்டு சென்றார் .அவர்களை போன்று இந்தியா ஒரு மொழிதேசம்
என நினைத்திருப்பார் போலும்.

சுரிநாமியர்கள் நெதர்லாந்து ஆதிக்கத்தின் கீழ் இருந்ததால் அங்கிருந்து புலம் பெயர்ந்து இங்கிருக்கிறார்கள். சுரிநாமிற்கு பல இந்தியர்கள் ஆங்கிலேயர்கள் காலத்தில் ஒப்பந்தடிப்படையில் போய் அங்கிருந்து நெதர்லாந்து வந்திருக்கின்றனர். அவர்கள் உணவு வகைகள்  பல, இந்திய மக்களை போன்றே உள்ளது. ரயில் கடற்கரையில் எங்களை இறக்கிவிட்டது.

பலத்த காற்று அனைவரையும் ஆட்டுவித்தது. கடலின் நீளத்துக்கு பிளாட்பாரத்தில் உணவுக்கடைகள் . அக்கடைகளை கடந்தால் மணல்வெளி .    மணல்வெளியெங்கும் முரட்டுத்தனமாய் அலைந்துகொண்டிருந்தன கடற்பறவைகள். சிலர் கையில் இருந்த  இத்தாலிய வேகப்பத்தை அதற்கு கொடுத்து அப்பறவைகளின் அமைதியை கெடுத்துவிட்டனர் . ஒரு பறவை அப்பண்டத்தை வாயில் கவ்வ அதனை பங்குபோட பத்துப்பதினைந்து பறவைகள் வட்டமிட , இது தப்பிக்கப் பார்க்க , பறவைகளினூடே கலவரம் . தலையின் மேல் கைவைத்து எங்களை காப்பாற்றிக்கொள்ள நினைத்தோம் . அங்கும் இங்கும் முப்பது நாற்பது கடற்பறவைகள் களைந்து சுற்றின . தூரத்தில் ஒரு நாய் கடல் அலைகளை பார்த்து குறைத்துக் கொண்டிருந்தது. நாயின் சொந்தக்காரர் நீர்சறுக்கு விளையாடிக்கொண்டிருந்தார்.

நீளக்கடற்கரையின் மத்தியரேகையாய் ராட்சத ராட்டினம் . நடுக்கடலை ராட்டினத்திலிருந்து பெரும் கூட்டம் பணம்கொடுத்து ரசித்துக் கொண்டிருந்தது.  இராட்டினம் ஏறும்  பாலம் ஒன்று  அமைக்கப்பட்டிருந்தது. பாலத்தின் தூண்கள் வானவில்லின் வண்ணங்களால் தீட்டப்பட்டிருந்தன.   அதன் அடியில் அமைதியாய் இரண்டு கடற்பறவை.  அதன் அருகில் அழகை நிழற்படமாக்க தானும் கருவியுமாய் ஒருவர் நின்றிருந்தார் .  கொஞ்சம் தள்ளி ஒரு அண்ணண் தங்கை கல்லை வீசி தவக்களை விட்டுக்கொண்டிருந்தனர். தண்ணீரில் தவக்களை விடுவது என்பது  தட்டையான கல்லை எடுத்து தரையொட்டி நீரை நோக்கி எறிகையில் அது குதித்து குதித்து  செல்லும் . அதிகமாய் குதிக்கும் கல்லை எறிந்தவர் வெற்றிபெறுபவர் . இதை வேறுபெயரில் அந்த ஐரோப்பிய குழந்தைகள் விளையாடிக்கொண்டிருந்தனர்.


வந்தியத்தேவனுடைய வெளிமனம் சோழ நாட்டின் இயற்கை வளங்களைப் பற்றியும் இராஜரீகக் குழப்பங்களைப் பற்றியும் எண்ணிக் கொண்டிருக்கையில் அவனுடைய உள்மனம் அந்த மங்கையினிடத்திலேயே ஈடுபட்டிருந்தது. இப்போது உள்மனம் வெளிமனம் இரண்டும் ஒத்து அம்மங்கையைக் குறித்துப் பட்டவர்த்தனமாகச் சிந்திக்கத் தொடங்கின. ஆம் பொன்னியின் செல்வனை பற்றிய பேச்சு தொடங்கி , கல்கியின் அமரத்துவம், பாலகுமாரனின் உடையார்  பொன்னியின் செல்வனை விட எவ்வகையில் மாறுபட்டது ?  சிவகாமியின் சபதம் , பார்த்திபன் கனவு என தொடர்ந்து  தமிழ் புத்தக போதையை எங்களுக்குள் ஏற்றிக்கொண்டோம்.

மேல்சொன்ன அத்தனையும் அமைதியாய் பார்த்துக்கொண்டே கடல் அமைதியாய் எங்கள் கால்நினைத்து சென்று , தன் தோழியான மழையோடு வந்து உடல் நனைத்தது. ஓடிவந்து  ரயிலேறி , வீடு வந்து  சேர்கையில்  வானம்பளிச்சென பல்இளிக்க , ஒளிந்திருந்த மாலைக்கதிரவன் கண்ணடித்தான்.

அ ..ஆ..ஆம்ஸ்டெர்டாம்  .!

 

   

#அ ..ஆ ..ஆம்ஸ்டெர்டாம் - 1

நள்ளிரவு 12 மணிக்கு வீட்டிலிருந்து கிளம்பி 80கிலோமீட்டர் பயணமாக பெங்களூருக்கு மிகத்தொலைவில்  இருக்கும் பெங்களூரு விமானநிலையத்துக்கு வந்து சேர சுமார் இரண்டு மணிநேரம் ஆனது . அதில் சிறிது கூட எனக்கு அசதியா தூக்கமோ வரவில்லை . இந்த முறை பயணம் ஆம்ஸ்டெர்டாம் வரை என்பதால் கையில்  சுதாகர் கஸ்துரியின் வலவன் டிரைவர் கதைகள்  , பாலகுமாரனின் பலாமரம் , செல்லப்பாவின் வாடிவாசல் ஆகிய புத்தகங்கள் உடன் வைத்திருந்தேன் .

வலவன், டிரைவர் கதைகள்  இப்போதைக்கு உள்ளயே இருக்கட்டும் என நினைத்தாரா என்னவோ மகிழுந்து ஓட்டுநர் அன்பு, தன் கதையை சொல்ல ஆரம்பித்தார் . ஷிமோகாவில் பிறந்த அன்பு 1960'ல் தந்தையின் பிழைப்புக்காரணமாக நெய்வேலிக்கு குடிபெயர்ந்தவர். தாய்மொழி தெலுங்கு , பிறந்தவூர் கன்னடப்பிரதேசத்தில் ஷிமோகா, வளர்ந்தது நெய்வேலி என் தென்னிந்தியா கலவை அவர் . டிப்ளமோ படித்து நிலக்கரி தொழிற்பயிற்சி கற்றுக்கொண்டிருந்த வேலையில் மத்திய சர்க்கார் மாற்றம் ஏற்பட்டு எந்த ஆஃப்ரீன்ட்டிஸ்களும் நிரந்தரமாக்கப் படமாட்டார்கள் என அறிவிப்பு வர ஒரு பிரபல வக்கீலிடம் இவரை போன்ற 75பேர் தலா 1000ரூபாய் வரை கொடுத்து நிலக்கரி நிறுவனத்துக்கு எதிராக வழக்கு தொடர செய்தார்களாம் . 75 பேர் கூட்டம் 500 வரை தொட , வக்கீலின் பாக்கெட்டும் வீங்கிக்கொன்டே செல்ல சுமார் 18மாதங்கள் கழித்து எந்த நம்பிக்கையும் இல்லாமல் சொந்த ஊரான ஷிமோகாவுக்கே வந்தார்களாம்.  தன்னுடன் வெளியேற்றப்பட்ட பலர் தன்னம்பிக்கை இழந்து , உடல் மெலிந்து வெளியூர் செல்ல துணிவில்லாமல் அப்படியே காலத்தின் பிடியில் சருகாகி போனார்கள் என கண்ணீருடன் கூறினார் .  தற்போது 14ஆண்டுகளாக ஒரு நிறுவனத்தில் மகிழுந்து ஓட்டுநராக இருப்பதாகவும் , இவர்களுக்கு நிரந்தர ஊழியர் நன்மைகள் கிடைக்காமலிருக்க நிறுவனம் தினக்கூலி அடிப்படையில் சம்பளம் தருவதாகவும் கூறினார். சுமார் 8 கிலோமீட்டருக்கு பளபளவென இருந்த விமானநிலைய சாலை பெரிய லாரி விபத்துக்குள்ளானதால்  அடைக்கப்பட்டு, பாலத்துக்கு அடியில் நெரிசலாக அனைத்து வாகனமும் அனுப்பப்பட்டது .

இப்போ உங்கக் கிட்ட சொன்னேன்ல எங்களை தினக்கூலியா வெச்சு முதலாலிங்க  சம்பாதிக்கிறாங்க அது தான் இதுக்கு காரணம் என்றார். ஒரு நாளில் 8மணிநேரம் வண்டி ஓட்டினால்  400ருபாய், 12 என்றால் 600 ருபாய், 16 என்றால் 800ருபாய் , 20 என்றால் 1000ருபாய் . எல்லாரும் தினம் 1000சம்பாதிக்க வேண்டி தூக்கமில்லாமல் வண்டியோட்ட ஏதோ ஒரு நாள் எல்லா வண்டிகளும் கவிழும் என்றார் . தொடர்ந்து காங்கிரஸ் கட்சியின் முன்னாள் முதல்வரின் பேரத்தினால் இந்த விமான நிலைய கதையும் , நம் பிரதமரின் மாநில வணிகச்சந்தை கொள்கைகள் பற்றியும் என் நிறுவன நிறுவனரின் குடும்ப சண்டை பற்றியும், ரஜினி-கமல் இனைந்து அரசியல் வரவேண்டிய கட்டாயம் பற்றியும் , பன்மொழிக்கல்வியின் அவசியம் பற்றியும் என என் நீண்ட பயணத்தை நினைவில் நிற்கும் பயணமாக மாற்றினார் அன்பு . பாவம் அவரும் சாதாரண ஊழியர் தான், பயண தூரத்தை குறித்துக்காட்டாமல் இரசீதில் என் கையொப்பம் பெற்று விடைபெற்றார் .

பிரம்மாண்டமாய் கட்டப்பட்டிருந்த  விமான நிலையம் பாராபட்சமாய் அந்த நள்ளிரவில் கூட ஆயிரம் அன்புகளை வாயிலோடு வரவேற்று அனுப்பிக்கொண்டிருந்து .

#அ ..ஆ ..ஆம்ஸ்டெர்டாம்

வட்டமான சாலை

வட்டமான சாலையில்
அனைவரும் வரிசையாக ,
ஒருவர் பின் ஒருவராக ,
சென்று கொண்டிருக்கிறோம்  என
அறியாமல் செல்கிறோம்.
பாலைவனங்களில்
மெல்லச்  செல்லும் ஒட்டகங்ளாக,
ஒட்டகங்கள் நடந்து செல்லும்
நீளமான மணல் பரப்பாக ,
மணல் திருடி நெடுஞ்சாலை
மறைக்கும் பாரஊர்திகளாக ,
அதன் சாரதியின் பசியலுப்புத்
தீர்க்கும் சாலையோர வேசியாக ,
அவள் அறியாமல் சுமந்து பெற்ற
தேவனின் பிள்ளைகளாக ,
தெய்வங்களிடம் ஆலயங்களுக்குள்
கைகைகூப்பி  நிற்கும் மனிதனாக ,
அதன் வாசலில் மனிதனிடம்
கையேந்தும் பிச்சைக்காரனாக ,
அவன் கைகளில் தானமாய்
பிரசாதத்தை தரும் எச்சில்கரனாக,
தரையில் சிந்திய வெல்லப்பாகை  
நக்கிச் செல்லும் சிவப்பெறும்பாக ,
எறும்புகளை மிதிக்கும்
ஒட்டகத்தோல் காலணிகளாக
மாறி மாறி மிதித்தே
முடிகிறது வட்டமான சாலை .

நல்லைஅல்லை

"நல்லை  அல்லை " , குறுந்தொகையை சிந்திக்க வைத்த வைரமுத்துவுக்கு நன்றி சொல்லி ஆகவேண்டும்.. இன்பத்தமிழின் இனியசொற்களை பிரயோகிக்கும் போது  வரும் சுகமே தனி .

நம்மில் எத்தனை பேர் குறுந்தொகை படைப்பினை பற்றி பேசியிருப்போம் . அதனில் இருந்து இரண்டுவார்த்தை இன்று தமிழகமே முனகிக்கொண்டிருக்கிறது .

தலைவன் இரவில் தலைவியிடம் வந்து பழகுங் காலத்தில் அவனை விரைந்து மணம் செய்து கொள்ளும்படி தூண்ட எண்ணிய தோழி, “நிலவே, நீ இரவில் வந்தொழுகுந் தலைவரது களவொழுக்கத்திற்கு நன்மை செய்வாயல்லை” என்று கூறி இரவின் நிலவை  மறுத்ததாக அமையும் பாடல் குறுந்தொகையில் 'நல்லை அல்லை ' எனும் பிரயோகத்துடன் அமைந்துள்ளது .

இந்த திரைப்பட பாடலும் அதைப் போன்றே நாயகன் தொடர்ந்து நாயகியை தேடி அவளை அடைய நினைக்கும் போது அவள் தவிக்க விட்டு ஓடுவதையும் , அந்த நேரத்தில் செல்லமாக நிலவின் , இரவின் மீதும் கோபப்படுவதும் அத்தனை அழகு .

நம்மால் கூறப்படும் செய்தியைக் கேட்டறிதற்குரியவர் முன்னே இருக்கும் போதும் ,  அவரை நேரடியாக கூறாமல், வேறு ஒருவரை யேனும், மற்றோரு  பொருளையேனும் காட்டிக் கூறுவது முன்னிலை புறமொழியாகும் . அவ்வாறாக காதலன் காதலியின் உரையாடலை சங்கத்தமிழ் சொல்லுடன் நயம்பட அளித்திருக்கிறார் கவிஞர் .


நல்லை அல்லை நன்னிலவே நீ நல்லை அல்லை ,
நல்லை அல்லை நள்ளிரவே  நீ நல்லை அல்லை ,
நல்லை அல்லை நாறும்பூவே  நீ நல்லை அல்லை ,
முல்லை கொல்லை நீ நல்லை அல்லை

#காற்றுவெளியிடை
#நல்லைஅல்லை

நாளொன்று போவதற்குள்

நாளொன்று போவதற்குள் ,
  நான்பட்ட பாடனைத்தும் ..!
தெரியாதோ ,  கார்முகிலே ,
  கடற்கரையை , கருவிழியே .!

ஆண் :

மேகம் சிவந்து கண்ண கசக்குது , அடியே .!!
உன் முகமோ அதுவே ,
என்னடி என் மேல் கோவம்,
சேர்ந்தே இத கடந்து போவோம் ..!!

( கார்முகிலே , கடற்கரையை , கீற்றொளியே , கருவிழியே .!)

பெண்:

நம் காதல் கண்களின் நீரும், அது தான்
சிலிர்க்கும் மழை துளியே ,
உன்மேல் எனக்கேன் கோவம் ,
மழைநீரின் குளிர்ச்சியை பார் புரியும் .!

( கார்முகிலே , கடற்கரையை , கருங்குயிலே , கருவிழியே .!)

 ஆண் :

நுனிப்புல்லாய்  ஆடித் திரிந்தேன் , பெண்ணே
உன் மூச்சின் சுவாசம் ,
எனை ஆட்டிய ஆட்டம் ,
ஒவ்வொரு நொடியும் பாடாய் படுத்தும் .


பெண் :

எப்புயலும் உனை களைந்திடவில்லை , அடடா
நம் காதலின் வீரம்  ,
உனை தாங்கிய  தாரம் ,
தினம் உடனிருந்தாயே உனக்கே தெரியும் .!!

நிலையில்லா பருவம் போல் , மனமே ,
நினைக்குது உனை தினமே ,
உண்ணலும் உண்ணேன்,
யான் நீ இல்லா வாழலும் வாழேன்..!!

( கார்முகிலே , கடற்கரையை , கண்ணொளியே , கருவிழியே .!)

ஆண் :

நாழிகைகள் நின்றதடி சிந்தித்தேன் , யாரால்
என்னவளே உன்னால் ,
கடல் மணல் அணையிது ,
கரையும் அது கடந்தால் தெரியும் .

நாளொன்று போவதற்குள் ,
   நான்பட்ட பாடனைத்தும் ..!
அறிவீரே ,  கார்முகிலே , கடற்கரையை , கண்ணொளியே , கருவிழியே .!

தூரம்

சிதறிய செந்நீர் கூழாங்கற்கள் ,
சிதிலமடைந்த சாராய பாட்டில்கள் ,
கற்பிழந்த ரசாயன குண்டுகள் ,
வீரியமிழந்த லாரிநீர்க் குழாய்கள்,
ஒளியிழந்து இருண்டுடைந்த  பல்புகள் ,
வாய்பிளந்த லத்திக் கம்பங்கள் ,
உயிரற்ற நடைப்பிணங்கள்,
சமாதானமாய் முடிந்தது தூரத்திலோர்
சமத்துவப் போராட்டம் ..!!

பாரதி பாரதி பாரதி !!!

பாரதியை போன்றதொரு ரசனைமிக்க கலைஞனை கவிஞனை  நாம் காண்பதரிது .  பக்திப்பாடல்கள் , தோத்திர பாடல்கள் , பாமாலைகள் ,வேதாந்தப் பாடல்கள் ,தேசபக்தி பாடல்கள் ,
தேசத்தலைவர்களுக்காய் பாக்கள் , காவியங்கள்  என எண்ணிலடங்கா படைப்புகளை நமக்கு அளித்திருக்கிறார் .

அவருடைய பிறந்தநாளன்று முகநூலில் நடக்கும் பாரதி பிறந்தநாள் நேரலை நிகழ்வுக்காக பாரதியின் இரண்டு அழகான படைப்புகளை கலந்து , மஹாகவியின் அதே வரிகளோடு , பொருட்சுவையோடு உங்களுக்காக இதோ அளிக்கிறேன் . மாயையை பழித்தல் எனும்  ஒரு வேதாந்தப் பாடலையும் ,  சிருங்கார ரசம் பொங்கும் கண்ணன் என் காதலன் எனும் ஒரு காதல் கவியத்தையும் கலந்து இதோ உங்களுக்காக .

தூண்டிற் புழுவினைப்போல் -- வெளியே
சுடர் விளக்கினைப்போல்,
நீண்ட பொழுதாக -- எனது
நெஞ்சந் துடித்த தடீ.

கூண்டுக் கிளியினைப்போல் –
தனிமை கொண்டு மிகவும் நொந்தேன்;
வேண்டும் பொருளையெல்லாம் –
மனது வெறுத்து விட்டதடீ.

உண்மை யறிந்தவர் உன்னைக் கணிப்பாரோ மாயையே
மனத் திண்மை உள்ளாரை நீ செய்வதும் ஒன்றுண்டோ மாயையே.

நீண்ட பொழுதாக -- எனது
நெஞ்சந் துடித்த தடீ.
மனத் திண்மை உள்ளாரை நீ செய்வதும் ஒன்றுண்டோ மாயையே


பாயின் மிசைநானும் -- தனியே
படுத் திருக்கையிலே
தாயினைக் கண்டாலும், -- சகியே,
சலிப்பு வந்ததடி.

வாயினில் வந்ததெல்லாம், -- சகியே,
வளர்த்துப் பேசிடுவீர்;
நோயினைப் போலஞ் சினேன், -- சகியே
நுங்க ளுறவையெல்லாம்.

எத்தனை கோடி படைகொண்டு வந்தாலும்    மாயையே
 நீசித்தத் தெளிவெனும் தீயின்முன் நிற்பாயோ மாயையே.
தாயினைக் கண்டாலும், -- சகியே,
சலிப்பு வந்ததடி
நீசித்தத் தெளிவெனும் தீயின்முன் நிற்பாயோ மாயையே

உணவு செல்லவில்லை; -- சகியே
உறக்கங் கொள்ளவில்லை.
மணம் விரும்பவில்லை; -- சகியே,
மலர் பிடிக்கவில்லை;
குண முறுதியில்லை; -- எதிலும்
குழப்பம் வந்ததடீ;
கணமும் உள்ளத்திலே -- சுகமே
காணக் கிடைத்ததில்லை


என்னைக் கெடுப்பதற்கு  எண்ணமுற்றாய்கெட்ட மாயையே
நான்உன்னைக் கெடுப்ப துறுதி என்றேயுணர் மாயையே.
மணம் விரும்பவில்லை; -- சகியே,
மலர் பிடிக்கவில்லை
நான்உன்னைக் கெடுப்ப துறுதி என்றேயுணர் மாயையே.


பாலுங் கசந்ததடீ; -- சகியே,
படுக்கை நொந்ததடீ.
கோலக் கிளிமொழியும் -- செவியில்
குத்த லெடுத்ததடீ.

நாலு வயித்தியரும் -- இனிமேல்
நம்புதற் கில்லையென்றார்;
பாலத்துச் சோசியனும் -- கிரகம்
படுத்து மென்றுவிட்டான்

சாகத் துணியிற் சமுத்திரம்  எம்மட்டு  மாயையே
இந்தத்தேகம் பொய் யென்றுணர்தீரரை என் செய்வாய் மாயையே.

நாலு வயித்தியரும் -- இனிமேல்
நம்புதற் கில்லையென்றார்
இந்தத்தேகம் பொய் யென்றுணர்தீரரை என் செய்வாய் மாயையே



கனவு கண்டதிலே -- ஒரு நாள்
கண்ணுக்குத் தோன்றாமல்,
இனம் விளங்கவில்லை, -- எவனோ
என் அகந்தொட்டு விட்டான்.
வினவக் கண்விழித்தேன்; -- சகியே,
மேனி மறைந்துவிட்டான்;
மனதில் மட்டிலுமே -- புதிதோர்
மகிழ்ச்சி கண்டதடீ.


இருமை யழிந்தபின் எங்கிருப்பாய் அற்பமாயையே
தெளிந்தொருமை கண்டார் முன்னம் ஓடாது நிற்பையோ மாயையே.
வினவக் கண்விழித்தேன்; -- சகியே,
மேனி மறைந்துவிட்டான்;
தெளிந்தொருமை கண்டார் முன்னம் ஓடாது நிற்பையோ மாயையே.

உச்சி குளிர்ந்ததடீ; -- சகியே,
உடம்பு நேராச்சு.
மச்சிலும் வீடுமெல்லாம் -- முன்னைப்போல்
மனத்துக்கு  ஓத்ததடீ.

இச்சை பிறந்ததடீ -- எதிலும்
இன்பம் விளைந்ததடீ.
அச்ச மொழிந்ததடீ; -- சகியே,
அழகு வந்ததடீ.

நீதரும் இன்பத்தை நேரென்று கொள்வனோ   மாயையே
சிங்கம் நாய்தரக் கொள்ளுமோ நல் அரசாட்சியை மாயையே
இச்சை பிறந்ததடீ -- எதிலும்
இன்பம் விளைந்ததடீ.
நீதரும் இன்பத்தை நேரென்று கொள்வனோ   மாயையே
நீதரும் இன்பத்தை நேரென்று கொள்வனோ   மாயையே


எண்ணும் பொழுதில்லெல்லாம்,
அவன்   கை இட்டவிடத்தினிலே
தண்என்றிருந்ததடீ;
புதிதோர்  சாந்தி பிறந்ததடீ
எண்ணியெண்ணிப் பார்த்தேன்;
 அவன்தான்யாரெனச் சிந்தை செய்தேன்;
கண்ணன் திருவுருவம்
அங்ஙனே கண்ணின் முன் நின்றதடீ.

என்னிச்சை கொண்டு உனையெற்றி விட வல்லேன் மாயையே
இனி உன்னிச்சை கொண்டு எனக்கு  ஒன்றும் வராது காண் மாயையே.
கண்ணன் திருவுருவம்  அங்ஙனே கண்ணின் முன் நின்றதடீ.
கண்ணன் திருவுருவம்  அங்ஙனே கண்ணின் முன் நின்றதடீ.

வசீகரம்/கவர்ச்சி

அமைதியான அந்த இரவு
ஏதோ ஒரு காவுக்காய் காத்திருக்கிறது ,
யாரையேனும் புதிதாக இன்று வேட்டையாடலாமா
என யோசித்திருக்கையில் ,
அவள் வருகிறாள் .
இன்றும் அதே உணவா என நினைத்து
மனம் சோம்புகிறது இருட்டில் ஒளிந்திருக்கும் அந்த மிருகம்.
சிறுகுழந்தையாய் இருக்கும் போது
பெண் மரப்பாச்சிகளுடன்
விளையாடிய அந்த ஆண் மிருகம் ,
தான் வளர்ந்தாலும் வளராத பக்கத்து
வீட்டுக் குழந்தையுடன் விளையாடி,
பேருந்து நெரிசல்களில் அவள் ப்ருஷ்டங்கள்
தேடி  சிசினமுரசி  , வலைப்பூக்களில்
ஆடை களையப்பட்ட நாயகிகளின்
முலைகளில் இன்பம் கண்டு ,
ஐம்பதுக்கும் நூறுக்கும் நெடுஞ்சாலைப்
புதர்களில் சில நிமிடப்  பசியாறி ,
மெதுவாக நகரத்தின் உள்ளே
வந்து இப்போது மரத்தின்
பின்னே நின்றுகொண்டிருக்கிறது .
மரபுவழியுடையணிந்தவளை எடைபோடுகிறது.
 ஐந்தரை அடிக்காரி அவளின்
ஆறு  கஜப்புடவையையும் தாண்டி ,
கண்மூடி அவள் உள்ளங்கியை
மனதில் களைந்து நச்சுக்கொட்டி ,
கண் திறந்து அவளை பற்றப்
பாய்கிற அந்த மிருகம்,
 சுருண்டு சடாரென்று
தரையில் வலியில் புரள்கிறது,
மனிதமிருகத்தின் சதைக்கறியை
ருசித்த தெருநாய்கள்  வாயில் எச்சில் சொட்ட திரும்பி ஓட,
இவன் பார்த்தக் கவர்ச்சிக்கன்னி ஓடிவந்து சொல்கிறாள் ,
"அண்ணா , என்ன ஆயிற்று
இதோ  திரிவூர்தியை அழைக்கிறேன் என்று "
மிருகம் உயிர்ப்பிணமாக அந்த
வசீகரத்தொடைகளில் சாய்கிறது 

போலி - ஒரு பக்க கதை

கொல்லனை கட்டிக்கிட்டு  கொல்லைல தான்  சோறு வெடிக்கணும் என தன் ஆச்சி கூறியதை நினைத்துக் கொன்டே வெறும் சுவற்றை வெறித்துக்கொண்டிருந்தால் தங்கம்மாள் .  தீட்டாத வைரத்தின் கருமை நிறம் என்றாலும் , அக்காளுக்கு ஏற்கனவே வைரத்தம்மாள் என பெயர் வைத்துள்ளதாலும்,  ஆசாரி குடும்பம் என்பதாலும்  வைத்தபெயர் அது. தங்கத்தை நகையாக்கும் தொழில் என்பதால் இவர்களுக்கு வருமானம் அதிகமாகக் கிடைக்கும் என்று எல்லோரும் நினைப்பார்கள். ஆனால் அப்படியல்ல, இப்போது உள்ள நிலையே வேறு. அவர் இந்தத் தொழிலுக்கு வந்தபோது இருந்த நிலைமை வேறு.


இந்த கைராசிக்காரி புதிதாக திருமணம் ஆகி வந்த நேரத்தில் , பலரும் வந்து தங்கத்தைக் கொடுத்து,  திருமண விழாக்களுக்கும் மற்ற மங்கல விழாக்களுக்கும் தங்கள் விருப்பத்துக்கேற்ப விதவிதமான வடிவங்களில், நகைகளை செய்து கொடுக்கச் சொல்வார்கள். அப்போது ஏதோ சூதனமாக சேர்த்து வைத்த காசில் இரண்டு பெண்களுக்கு திருமணம் செய்தாயிற்று . முதல் வாரிசின் மூன்றாவது பிரசவத்திற்கு ஒரு மாதம் முன்னர் தாலியறுத்து வீட்டோடு ஒடுக்கப்பட்டால் தங்கம்மாள்.  புகையோடே குடியிருந்த இவளுக்கு , இன்னும் ஒரு பெண்ணை கரையேற்ற வேண்டுமே என்ற கவலை நுரையீரலை அரிக்க தொடங்கியது.



நகை செய்யும் ஆசாரி ஆதலால்  வீட்டில் வாசலில்  பட்டறைகள், கொல்லையில் சமைக்க , படுக்க, உடுக்க ஒரே அறை , வயக்காட்டில் நீரோடையருகே கழிவறை என இருந்தது அவள் வீடு.  குடும்பத்தில் உள்ள அனைவரும் ஒன்று சேர்ந்து நகை உருவாக்கத்தில் ஈடுபடுவர். நகை செய்வோர் தங்கத்தைக் கழுவிய நீரை சாக்கடையில் கொட்டிவிடுவதில்லை.  அந்நீரைக் காய்ச்சி அதில் இருக்கும் தங்கத் தூள்களை  எடுத்து விடுகிறார்கள். தன் வீட்டுக் பொடுசுகளுக்கு  சிறு சிறு நகைகள் செய்துவிடுகிறார்கள். அப்போதெல்லாம் நகை தொழில் செய்யும் கடைத்தெருவை அந்த கடை வாசலை தினமும் பெருக்கி எடுத்துச் செல்ல ஒரு கூட்டமே இருக்கும்.



இரண்டு பெண்டுகளுக்கு இப்படி ஏற்கனவே திருமணம் செய்தாயிற்று , மூத்தவள் மூன்று முறை வயிறு தள்ளி வந்தபோதெல்லாம் சீதனமாய் கொடுத்தாயிற்று,  இரண்டாமவளின் கணவனுக்கு அத்துணை வீரியமில்லையென்றாலும் , மனைவியிடம் வீரத்தை காட்டி அவ்வப்போது துளித்துளியாய் உருவிவிட்டான். பன்னிரெண்டாம்  வகுப்பு முடிக்கப் போகும் கடைக்குட்டியை கைப்பிடித்து கொடுப்பதே இப்போது இவளின் கவலை.


கவலை படிந்த கருத்த முகத்துத்  தங்கம்மாள், பிளாஸ்டிக் தோடின் திருகாணியை மெல்ல சரி செய்யும் போது கடைசிப்பெண் சரசு ஓடிவருகிறாள், "அம்மா நம்ம ஜில்லால  நான் தான் முதல் மதிப்பெண் , செலவில்லாம மேல படிக்கலாம் மா ". தங்கம்மாளின் போலிப் பற்கள் விடியலின் புன்னகையில் மின்னின

நகல்

மெல்லிய நாற்பது வாட் மின் குமிழ்விளக்கின் 
வெளிச்சம் தான் அங்கு , 
ஐம்பதுக்கு ஐம்பது சதுரடி அறை, 
அவளெப்போதும் அந்த அறையினுள் தான் , 
வடமேற்கு மூலையில் கிடப்பாள் 
திரைச்சீலையிடப்பட்ட அந்த ஓரத்தில் மெலிதான காற்றுக்காய் 
தளிகைவிசிறி ஓடிக்கொண்டிருக்க 
அன்று அவன் வருகிறான்,
சிலநாள் முன்னே மலர்ந்த சாம்பல் நிறத்து மொட்டிவள், 
அவன் வெளிர்த்தோற்றத்தையும் ,
கருமையான சுருட்டைமயிரையும் பார்த்து பல்லிளிக்க ,
அவன் மெதுவாக இவளை நோக்கி நெருங்கினான்.
அவன் தேகம் அவளின் மேல் அணைக்கையில் ,
வெட்கப்  புன்னகை பளிச்சென 
குறுக்கும்நெடுக்குமாய் தெறித்தன ,
வண்ணங்கள் அவளூடே கரைந்து 
கருப்புவெள்ளையாய் மாற முற்பட்டன.
சிலநிமிட சல்லாபத்தின் முடிவில் 
அந்த வீரியத்தின் நகல்கள் 
ரெண்டாகவோ , நான்காகவோ .

எச்சமாய் கீழே ..!!

நவம்பர் 9

நவம்பர் 9,2015 , காலை 6மணி . கொட்டும் மழை , இடி முழக்கம் காதுகளில்  எதிரொலிக்கின்றன , பளிச்சுடும் மின்னல் வெளி வர துடிக்கும் கதிரவனின் கூச்சத்தை போக்கி வானை கிழிக்கிறது . ஐந்து நாள் விடுப்பில் வந்து எனக்கு , நான்காம் நாள் காலை அது . சுமார் ஐந்தரை மணி அளவில் பெண் வீட்டார் எப்படியோ மழையில் நனைந்து எங்கள் வீடு வந்து சேர்ந்துவிட்டனர் . பெண் இன்னும் பெங்களூரிலிருந்து வரவில்லை .  பெருங்களத்தூர் அருகாமையில் வந்தவுடன் தொலைபேசியில்  அழைக்க, உடனே நானும் அரை ட்ராயர் போட்டுக்கொண்டு   , பாக்கெட்டில் மணிபர்ஸை திணித்துக்கொண்டு இருக்கும் ஒற்றை குடையை எடுத்துக்கொண்டு  பேருந்து நிலையம் நோக்கி விரைந்தேன் .  எதிரே வருவதை கூட பார்க்கமுடியாது அளவு வெளுத்துவாங்கும் மழை . எதிர்காலத்துணைவியை காண ஓடிக்கொண்டிருந்த நான் . தண்டவாளம் கடந்து ஒரு ஆட்டோ எடுத்துக்கொண்டு அது தாம்பரம் மேம்பாலம் வரை சென்று சுற்றி வரவும் , அவள் பேருந்தில் இருந்து இறங்கி நிற்கவும் சரியாக இருந்தது . ஓடும் ஆட்டோவினை மெல்ல உருட்டச்சொல்லி அவள் நிற்கும் திசை பார்த்து தலை நீட்டித்  தேடினேன் . பெங்களூரு குளிருக்காக போட்ட ஸ்வெட்டர் மழையை சுமந்துகொண்டிருக்க , கையில் கட்டைப்பையையும் முதுகில் ஏதோ பெருநிறுவனத்தில் கொடுத்த இலவச கணிணிப்பையுடன் அவள் நிற்க , கைகாட்டி ஆட்டோவினுள் இழுத்து அருகில் அமரவைத்தேன் . புதிய விடியல் ஆரம்பமானது . காலம்காலமாக பெண் வீட்டில் சென்று பார்க்கும் வழக்கம் இங்கு நடக்கவில்லை,மாறாக எங்கள் வீட்டில் பெண் வந்து பார்த்த மாறுபட்ட ஏற்பாடு .  சாயம் பூசிய முகத்திரையை பார்க்க வேண்டிய ஏமாற்றம் எனக்கில்லை , இயற்கை அன்னையின் தயவில் செயற்கைகளில்லா அகஅழகை காண நேர்ந்தது . பெண்ணை பாடச்சொல்ல வில்லை, சமையல் பற்றியே பேச்சே துளியும் இல்லை. பார்க்க , பேச , பழக , உணர சிலநொடிகள் போதுமானதாக இருந்தது . எடுத்துக்கொள்ள நான் இருக்க , தன்னை கொடுக்க அவள் இருக்க இருமணங்கள் திருமண நாள் குறிக்க ஒப்புதலானது . 

கொட்டும் மழை , இடி முழக்கம் காதுகளில்  எதிரொலிக்கின்றன , பளிச்சுடும் மின்னல் ஓடிப்போகவிருக்கும் கதிரவனின் கோழைத்தனத்தை வெளிச்சத்தில் காட்டுகிறது . அன்றை போன்ற அதே நிகழ்வுகள் . மீண்டும் மழையில் ஓடிக்கொண்டிருக்கிறேன் அவளை அழைத்துவர. இம்முறை கடல்கடந்து.  இன்று நவம்பர் 9, 2016.

காதல் , நிச்சயம் , திருமணம் கடந்து மீண்டும் அதே நாள் இருவரையும் இணைக்கிறது .!

அன்பு விஜய் டிவிக்கு

அன்பு விஜய் டிவிக்கு ,

பதினைந்து ஆண்டுகளுக்கு மேலாக தொடர்ந்து தரமான நிகழ்ச்சிகளை அளிக்கும் விஜய் டிவி ரசிகனாக இதை பகிர்கிறேன். இன்றளவில் தமிழ் சேனல்களில் நல்ல ஜனரஞ்சகமாகவும் , சமுதாயம் நலன் சார்ந்தும் , திறன் வளர்க்கும், பொழுபோக்குக்கெனவும் பிரிவு வாரியாக நல்ல நிகழ்ச்சிகளை அளித்து வருகிறீர்கள். விஜய் தொலைக்காட்சி , ஸ்டார் விஜய் ஆக மாறி சுமார் பதினைந்து ஆண்டுகள் ஓடிவிட்டன. தமிழ் தொலைக்காட்சி வரலாற்றில் தனி ஆளாக ஆதிக்கம் செலுத்திய சன் குழுமத்திடம் இருந்து பெருவாரியான ரசிகர்களை நீங்கள் இழுத்திருக்கிறீர்கள். தொலைக்காட்சி ரசிர்களுக்கு அன்றே, முதன் முதலில் தமிழில் ஹாலிவுட் டப்பிங் படங்கள் காட்டினீர்கள் . உங்களை போல பின்தொடர்ந்த ஜெயா , ராஜ் ஏன் சன் டிவி கூட அன்று அதில் உங்களை முந்த  முடியவில்லை. ஸ்டார் கைப்பற்றிய பின்னர் ஐந்து ஆண்டுகள் கழித்தே நிகர  லாபம்  அடைந்தீர்கள் இன்று கண்டிப்பாக நீங்கள் தான் முன்னிலையில் இருக்க வேண்டும். 

என் சிறுவயதில் அறுபது ருபாய் கேபிளுக்கு கட்டி போர்ட்டபிள் டிவியில் வரும் பன்னிரண்டு சேனல்களில் திருகித்திருகி ட்யூன் செய்து விஜய் டிவியில்  மாயா மச்சிந்த்ரா , ஜீ பூம் பா,  விஜய் லட்சாதிபதி , ஜென்மம் எக்ஸ்  நிகழ்ச்சிகளை ரசித்து பார்த்திருக்கிறேன். கனா காணும் காலங்கள் தொடரின் ஒவ்வொரு எபிசோடும் மனப்பாடமாக வைத்திருந்த என் பள்ளித் தோழிகளை எனக்கு தெரியும் . 

ஒவ்வொரு வாரமும் லொள்ளு சபா யாரை கிண்டல் செய்வார்கள் எப்படி செய்வார்கள் என்ன யோசித்து மண்டை குழம்பியிருக்கிறோம், காதலிக்க நேரமில்லை தொடரை அந்தத் தொடக்கப் பாடலுக்காகவே பார்த்திருக்கிறோம். பாடத்தெரிந்த இளைஞர்களை ஊக்குவித்து சூப்பர் சிங்கர் மூலமாக மாபெரும் மேடையேற்றிய பெருமை உங்களையே சேரும் . கலக்க போவது யாரு என பல சிரிப்பு மன்னர்களை தமிழர்களுக்கு அடையாளம் காட்டியது நீங்கள் தான். 

கள்ளிக்காட்டு பள்ளிக்கூடம், 7C  என தமிழ் தொடர்கள் தொடாத ஒரு கல்விக்கூடம் சார்ந்த கதை எடுத்தீர்கள் , பெருமை . தர்மயுத்தம் என வக்கீல் சார்ந்த தொடர் எடுத்தீர்கள் , புதுமை. கணவன் மனைவியின் அழகான உறவை சரவணன் மீனாட்சியை காட்டி மக்களை கவர்ந்தீர்கள். ஒரு வார்த்தை ஒரு லட்சம் மூலம் பள்ளிக்குழந்தைகளையும் , ஆசிரியர்களையும் உங்கள் பக்கம் இழுத்துவிட்டீர்கள் .  

லொட லொட பேச்சில் எங்களை டி.டி  உடன் அருமையான காபி அருந்த வைத்தீர்கள். நீயா நானா பற்றி கூறாவிட்டால் நான் தங்கள் தொலைக்காட்சியின் ரசிகனே அல்ல. மிகச்சிறந்த  ஒரு சமுதாய பார்வை கொண்ட நிகழ்ச்சியான இதையும்  மேடையேற்றியுள்ளீர்கள். வருடா வருடம் விஜய் விருதுகள் உலக அளவில் எதிர்ப்பார்ப்புகளை உருவாக்கியுள்ளது .

இன்றளவும் இன்னபிற சேனல்களை பார்க்கும் போது பல மடங்கு தரமான நிகழ்களான கனெக்ஷன், ஜோடி , அது இது எது , சமையல் சமையல் , நீங்களும் வெல்லலாம் ஒரு கோடி போன்ற நிகழ்ச்சிகள் மக்களை மகிழ்விக்கின்றன. 

பின்னர் ஏன் இந்த விபரீத முயற்சி ? 

ஆம் வரும் திங்கள் கிழமை முதல் நீங்களும் சராசரி சேனலாக மாறிவிடப் போகிறீர்கள் என்ற வருத்தம் எனக்கு. எதற்காக இந்த டப்பிங் சீரியல்கள் ?  ஏற்கனவே என் கணவன் என் தோழன் , சீதையின் ராமன் , என் அன்பு தங்கைக்கு என மூன்று டப்பிங் சீரியல்கள் ஓளிபரப்பாகின்றன. 

போதாக்குறைக்கு பிற சேனல் போல் நீங்களும் சனிக்கிழமையும் சீரியல் போட ஆரம்பித்தாயிற்று.  இப்போது மதியம் 2 மணிமுதல் இரவு 9 மணி வரையில் மீண்டும் தொடர்ந்து அலுக்கப்போகும் தொடர்கள் தேவையா ? போதாக்குறைக்கு இன்னும் நான்கு ஆறு டப்பிங் தொடர்களான மகாதேவ் , மங்கையின் சபதம் , அம்மா , என்னுடைய தோட்டத்தில் , என்றும் என்னுடன் , கிரண் மாலா என அடுக்கிக் கொண்டே செல்கிறீர்கள் .

நாங்கள் பார்த்து வளர்ந்து இன்று மாபெரும் தமிழ் தொலைக்காட்சி சாம்ராஜ்யமாய் இருக்கும் விஜய்  தொலைக்காட்சியின் சிறப்பே புதுமையும் எதார்த்தமும் தான் . டப்பிங் சீரியலில்   வருவது போல் இங்கு அலங்கரித்து நிற்கும் மருமகள்கள் இல்லை , ஆனால் மீனாட்சியை போன்ற யதார்த்தமான பெண்கள் உண்டு.  பதினைந்து பேர் எப்போதும் முழு அலங்காரத்துடன் விசாலமான அறைகளில் மொக்கையான டப்பிங் வசனங்கள் பேசுவதில்லை , ஆனால்  கூட்டமாக இருக்கும் குழந்தைகளுக்கு நல்லது சொல்லு ஸ்டாலின் போன்ற ஆசிரியர்கள் உண்டு.

பெங்காலி , ஹிந்தி சீரியல்கள் நன்றாக இருக்கலாம் , ஸ்டார் குழுமம் அதன் உரிமைகளை வைத்திருக்கலாம் , அப்படியானால் நாங்கள் பார்த்து பழகிய , தெரிந்த நம் ஊர் கலைஞர்களை வைத்து , அந்த கதைகளை ரீமேக் செய்யலாம் . அதுவும் உங்களுக்கு புதிதல்ல , இன்று ப்ரைம் டைம் ஷோவாக இருக்கும் கல்யாணம் முதல் காதல் வரை ஹிந்தி சீரியலின் ரீமேக் தான் .

உங்களிடம் இருந்து தரமான நிகழ்ச்சிகளையே பார்த்து விட்டு , இன்று இப்படி பல டப்பிங் தொடர்களை பார்க்க மனம் கஷ்டமாக இருக்கிறது . கனா காணும் காலங்களும் , காதலிக்க நேரமில்லை தொடர்களும் நீங்கள் மாரு ஒளிபரப்பு செய்தால் கூட கண்டிப்பாக பல ரசிகர்கள் உங்களுடன் இருப்பார்கள் .

நன்றி,

விஜய் டிவி ரசிகன்  

கோடை

ஆழ்குழாய்கிணற்றின் உப்பு நீர் மொட்டைமாடி ஏறி 

வெதுவெதுப்பாய் குளியலறை குழாயில் ஒழுகுகையில் ,

வாசலில் அடிபம்ப்பில்  வந்த கார்பொரேஷன் நல்ல நீரால் நிரப்பப்பட்ட 

அலுமினிய வாளியில் இவர்களின் முதல் சந்திப்பு .

இருவரும் நீர்ச்சாதி  ஆயினும் வெவ்வேறு உட்பிரிவுகள் .

சிறுநொடிக்காதலை குலைக்க மானுடன் வருகை .

ஒன்றரக்  கலந்த இவர்கள் ஆறாம் அறிவின் அழுக்கை சுமக்கும் அவலம் ,

மணமணக்கும் செயற்கையான இயற்கை  நுரைகளில் மூச்சுத்திணறி 

சாக்கடைகளில் கலந்து முடிகிறது இவர்களின் காதல்.

இல்லை இதோடு முடியவில்லை , 

அண்ணன் ஆதித்தன் அணைப்பில் வெதுவெதுப்பை வளர்ந்த 

தங்கையின் நினைவாக மனிதர்களை பழிவாங்குகிறான் 

பிசுபிசுப்பான வியர்வையாய் .! 

#கோடை #குளியல் 

சைத்தான்

சமீப காலமாக கற்பனைத்திறனும் கலைத்திறனும் திரையுலகில் இருப்போருக்கு குறைவாக இருப்பதாலோ , எங்கிருந்து எதைத் திருடுவது என்று அறியாமல் சகட்டு மேனிக்கு காப்பி அடித்துக் கொண்டிருக்கிறார்கள். சிலர் மறந்து போய் தன்னுடைய பழைய பாட்டின் தாளத்தையே போடுகிறார். மறந்ததே போயும் ஆங்கில , ஜப்பானிய படங்களை தமிழில் எடுத்துவிடுகின்றனர் பாவம் .

சரி, விஷயத்துக்கு வருவோம், இரண்டுநாட்கள் முன்னர் வெளிவந்த விஜய் அன்டனியின் சைத்தான் திரைப்பட ட்ரைலர் வந்தது . அதை பற்றி இப்போது வாட்ஸாப்பில் ஒரு குறும்செய்தி பரவிக்கொண்டிருக்கிறது. அந்த ட்ரைலரின் பின்னணி இசை தைத்திரீய உபநிஷத் ஒலிக்கும் மெட்டில் அமைக்கப்பட்டுள்ளது . போதாக்குறைக்கு என்ன வார்த்தை போடவேண்டும் என தெரியாமல் சைத்தானே என விஷ்ணுவுக்கு பின்னர் அவர் சொருகியிருக்கிறார். இதனால் பரம்பொருளை ஷைத்தானோடு ஒப்பிட்டு மத நம்பிக்கையை கிண்டல் செய்வதாக அந்த பதிவு கூறுகிறது.

கண்டிப்பாக காக்கும் கடவுளையும் , அழிக்கும் சைத்தானையும் ஒன்றாய் கூறுவது தவறு . இதில் இந்து மத நம்பிக்கையாளர்கள் மனம் புண்படலாம் . ஆனால் , இதெல்லாம் உண்மையாகவே நம்மில் பலருக்கு தெரியாது. யாரோ உண்மையாகவே மனம்புண்பட்ட ஒருவர் புலம்பியதை , நாமும் எல்லோருடனும் பகிர்கிறோம் . இவர் காப்பியடிக்காத இசையே இல்லை . கேட்டுவிட்டு அமைதியாக , ஒரு சராசரி தமிழன் எல்லாப் பிரச்சனைகளிலும் என்ன செய்வானோ அதைப் போல் விலகிச் சென்றுவிடலாம் அல்லது சட்டப்பூர்வமாக இதனை எதிர்கொள்ளலாம் .

திரையுலகம் நம் மதங்களை(இந்து , இஸ்லாம் , கிறித்துவம்) தன் இஷ்டம்போல் தொடர்ந்து சித்தரித்து வருகின்றது. இது போல ஒவ்வொரு படங்களிலும் தன் இஷ்டப்படி செய்கிறது. பிரபல இந்தி நாயகன் நடித்த சென்னை எக்ஸ்பிரஸ் படத்தில் நாயகியை முன்னூறு படிகளுக்கு தூக்கிச்செல்லவேண்டும் என்று கூறி, தூக்கியும் செல்வார். இல்லாத கற்பனை வழக்கம் நம் சமயத்தை அசிங்கப் படுத்தவில்லையா ? மலை உச்சியில் கிராபிக்ஸில் பெருமாளையும், சந்நிதிக்கு எதிரே மயிலையும் , பட்டை போட்ட குருக்களையும் கட்டியிருப்பார்கள் . இதெல்லாம் உச்ச கட்ட அபத்தம். படம் முழுக்க பெண் வீட்டார் தமிழர் என்பதால் ஆழ்வார்களும் , நாயன்மார்களும் , அண்ணாவும் பெரியாரும் காப்பாற்றிய தமிழை இஷ்டத்துக்கு கொச்சைப் படுத்தியிருப்பார்கள். வலிக்கவில்லையா ?

இப்பாடலில் மனது வருந்தியவர்கள் ஏன் சிலவருடங்கள் முன் மதம் மாறிய யுவன் சங்கர் ராஜாவின் பாடலை பற்றி வருந்தவில்லை ? " கோவிந்தா கோவிந்தா வெங்கட்ரமணா கோவிந்தா பாடலை, தன வசதிக்காக ஓ ஈசா , என் ஈசா என்று மாற்றிக்கொண்டாரே ? ஒருவேளை ஓர் மதத்துக்குள் கடவுள்களை மாற்றியதால் மறந்தோமா ? அதற்கு பின்னர் வரும் ஆங்கில வரிகள் ஆபாசம் இருக்குமே ? அது .

தசாவதாரம் படத்தில் அழகியசிங்கர் தெரியுமா எனக் கேட்கும் காட்சியில் பகுத்தறிவு நாயகன் கிண்டலாக மடோன்னா வா எனக் கேட்பார். கவர்ச்சி நாயகியும் , பரம ஆச்சார்ய ஸ்ரேஷ்டரையும் ஒப்பிடுவது சரியா ? விஸ்வரூபம் படத்தில் குரானை கூறி தீவிரவாதியை அழிக்கும் கட்சிக்கு எவ்வளவு பெரிய சர்ச்சை நடந்தது ? இதுபோல் இந்து வழக்கங்கள் கிண்டல் செய்யப்பட்டால் கண்டிப்பாக நடக்காது .

ஜனநாயக நாட்டில் பெரும்பான்மை மக்களுக்கு எதிராக செய்யப்படும் எதுவும் பெரிதாக எடுத்துக்கொள்ளப் படமாட்டாது என்பது நிதர்சன உண்மை. சாதிகளுக்கு அப்பாற்பட்டு இருந்த முத்தமிழ் அறிஞர் டாக்டர் முன்னாள் முதல்வர் கலைஞரும் கடைசி காலத்தில் ராமாநுச காவியம் படைத்ததை யாரும் மறுக்க இயலாது . சமயங்களை கிண்டல் செய்து பிழைக்கும் ஒரு சாரார் இருந்துகொன்டே தான் இருப்பர். இது போன்ற கேலியும், கிண்டலும், சுரண்டலும் மதங்களை , அதன் மடங்களை வலுப்பெறச்செய்கிறது , அதற்கும் மேல் ஒருதலைமுறை ஆதரவாளர்களை கடந்து அடுத்த தலைமுறை வெறியர்களை தூண்டுகிறது.

மனம் வருந்துவோரை நினைக்கையில், ஒரு உபன்யாசத்தில் கேட்ட கதை நினைவுக்கு வருகிறது. தன் வாழ்நாளில் எந்த ஒரு நல்லகாரியமும் செய்யாமல் இறக்கும் தருவாயில் இருந்த ஒரு தந்தை கூறிய கடைசி வார்த்தை தன் மகனின் பெயர் "நாராயணா". இதனால் பரமாத்மா கிருஷ்ணர் யமதூதர்களை விளக்கி அவனை விஷ்ணுலோகம் அழைத்துச் சென்றாராம்.

எத்தனையோ தடைகளை தாண்டி சனாதன தர்மம் தழைத்தோங்குகிறது. இதுவும் கடந்து செல்லும். இந்த சைத்தானை நாம் மறப்போம் , கடவுள் மன்னிப்பார்